आई – कविवर्य श्री. फ. मु. शिंदे सर यांची कविता

 

आई –

कविवर्य श्री. फ. मु. शिंदे सर यांची कविता

 

आई एक नाव असतं

घरातल्या घरात गजबजलेलं गाव असतं!

सर्वांत असते तेव्हा जाणवत नाही

आता नसली कुठंच तरीही नाही म्हणवत नाही!

 

जत्रा पांगते पालं उठतात

पोरक्या जमिनीत उमाळे दाटतात

आई मनामनात तशीच जाते ठेवून काही

जिवाचं जिवालाच कळावं असं जाते देऊन काही!

 

आई असतो एक धागा

वातीला उजेड दावणारी समईतली जागा!

घर उजळतं तेव्हा तिचं नसतं भान

विझून गेली अंधारात की सैरावैरा धावायलाही कमी पडतं रान!

 

पिकं येतात जातात

माती मात्र व्याकुळच तिची कधीच भागत नाही तहान!

दिसत नसलं डोळ्यांना तरी

खोदत गेलो खोल खोल की सापडतेच अंतःकरणातली खाण!

 

अंत:करणाहून  का निराळी असते आई?

ती घरात नाही तर मग कुणाशी बोलतात

 गोठ्यात हंबरणाऱ्या गायी?

 

आई खरंच काय असते?

लेकराची माय असते

वासराची गाय असते

दुधाची साय असते

लंगड्याचा पाय असते

धरणीची ठाय असते

 

आई असते जन्माची शिदोरी 

सरतही नाही उरतही नाही!

आई एक नाव असतं

घरातल्या घरात गजबजलेलं गाव असतं!

कविवर्य श्री. फ. मु. शिंदे सर

 ( महाराष्ट्राच्या हिंगोली जिल्ह्यातील कलमानुरी तालुक्यातील 'रुपूर' गावी  १९४८ साली श्री. फ. मु. शिंदे सर यांचा  जन्म झाला. पेशाने ते मराठीचे प्राध्यापक आहेत.' आई ' कविता प्रसिद्ध असुन वाचकांच्या अंतकरणाला भिडणारी आहे.)